150 ரூபாய்க்கு 150 சேனல்! வழங்கப்போகிறது பி.எஸ்.என்.எல்., இன்டர்நெட் இணைப்பும் உண்டு

மாதம் 150 ரூபாய் கட்டணத்தில் 150 சேனல்கள் பார்க்கும் வசதியினை பிராட்பேண்ட் ஐ.பி.டி.வி., இணைப்பு மூலம் பி.எஸ்.என்.எல்., வரும் மார்ச் மாதத்தில் வழங்குகிறது. இந்த இணைப்பு மூலம் டெலிபோன், இன்டர்நெட் இணைப்பையும் பெறலாம்.மொபைல் சேவைகளை பொறுத்தவரை பி.எஸ்.என்.எல்., நிறுவனம் கால் பதிக்காத வரை தனியார் மொபைல் நிறுவனங்கள், தங்கள் இஷ்டத்துக்கு கட்டணத்தை வசூலித்து வந்தன. ஜி.எஸ்.எம்., மொபைல் சேவையை பி.எஸ்.என்.எல்., வழங்கத் தொடங்கியவுடன் மொபைல் போன் கட்டணம் பெருமளவில் குறைந்தது. தற்போது, பி.எஸ்.என்.எல்., நிறுவனம் நவீன தொழில்நுட்பத்துடன் கூடிய மூன்றாம் தலைமுறை மொபைல் சேவையை அடுத்தாண்டு மார்ச் மாதத்தில் அறிமுகப்படுத்துகிறது.


இரண்டு பேக்கேஜ் திட்டங்கள் : கேபிள், டி.டி.எச்., சேவை மூலம் "டிவி' நிகழ்ச்சிகளைப் பார்த்து வந்த காலம் போய், தற்போது தொலைத் தொடர்பு சேவையில் " ஐ.பி.டி.வி., ' அறிமுகப்படுத்தப்பட்டுவிட்டது. இந்தியாவில் மும்பை, புனே உள்ளிட்ட பல முக்கிய நகரங்களில் ஏற்கனவே இந்த சேவை வழங்கப்பட்டு விட்டது. சென்னையில், வரும் மார்ச் முதல் இந்த சேவையை பொதுமக்கள் பெறும் வகையில், திட்டமிடப்பட்டுள்ளது. இதற்கான கட்டணம் தற்போதே அறிவிக்கப்பட்டுள்ளது. இதில், இரண்டு பேக்கேஜ் திட்டங்கள் உள்ளன. முதல் பேக்கேஜில் 75 சேனல் வரை 100 ரூபாய் கட்டணமும், இரண்டாவது பேக்கேஜில் 150 சேனல் வரை 150 ரூபாய் கட்டணமும் நிர்ணயிக்கப்பட்டுள்ளது.


ஒரு படத்திற்கு 50 ரூபாயும்: தேவையான திரைப்படங்கள் பார்க்கும் "வீடியோ ஆன் டிமாண்டு' வசதியும் வழங்கப்படுகிறது. இதில், திரைக்கு வந்து ஓர் ஆண்டுக்கு மேலான படங்களைப் பார்ப்பதற்கு, ஒரு படத்திற்கு 10 ரூபாயும், திரைக்கு வந்து ஒரு மாதத்தில் இருந்து ஓராண்டுக்கு உள்ளான படங்களை பார்க்க ஒரு படத்திற்கு 25 ரூபாயும் கட்டணம் நிர்ணயிக்கப்பட்டுள்ளது. திரையிடப்பட்டு ஒரு மாதமும் அதற்கு குறைவாகவும் ஆன படங்களை பார்க்க ஒரு படத்திற்கு 50 ரூபாயும், ஹாலிவுட் படத்திற்கு 50 ரூபாயும் கட்டணம் நிர்ணயிக்கப்பட்டுள்ளது. இந்த இணைப்பை பெறுவதற்கு செட் டாப் பாக்ஸ் அவசியம்.செட்டாப் பாக்சில் தனிப்பட்ட முறையில், வீடியோ படங்களை பதிவு செய்யும் வசதியும் உள்ளது.


வீடுகளில் ஆள் இல்லாத நேரத்தில் ஒளிபரப்பப்படும் படங்கள், (நிகழ்ச்சிகளை "பெர்சனல் வீடியோ ரெக்கார்டிங்- பி.வி.ஆர்.,) முறையில் பதிவு செய்துகொள்ளலாம். செட் டாப் பாக்ஸ் வாங்க முடியாதவர்கள், வாடகைக்கும் பெற்றுக்கொள்ளலாம். பி.வி.ஆர்., வசதி கொண்ட செட்டாப் பாக்சிற்கு 140 ரூபாயும், இந்த வசதி இல்லாத செட்டாப் பாக்சிற்கு 70 ரூபாயும் மாதவாடகை நிர்ணயிக்கப்பட்டுள்ளது. இந்த இணைப்பு பெறும் வாடிக்கையாளர்களுக்கு கட்டணம் பிராட்பேண்ட் கட்டணத்துடன் இணைத்து வழங்கப்படும்.

நன்றி
தினமலர்