ஒலிம்பிக்கில் சுஷில்குமார் வெண்கலம்! * விஜேந்தர் வெற்றியால் இன்னொரு பதக்கம் உறுதி

இந்திய ஒலிம்பிக் வரலாற்றில் நேற்று மறக்க முடியாத நாள். மல்யுத்த போட்டியில் சுஷில் குமார் வெண்கலம் வென்று சாதித்துக் காட்டினார். குத்துச்சண்டையில் விஜேந்தர் குமார் வெற்றி பெற்று, பதக்க வாய்ப்பை உறுதி செய்துள்ளார். ஏற்கனவே அபினவ் பிந்த்ரா துப்பாக்கிச் சுடுதலில் தங்கப்பதக்கம் வென்றுள்ளார். இதன் மூலம் ஒலிம்பிக்கில் முதல் முறையாக இந்தியா, மூன்று பதக்கங்களை கைப்பற்றும் வாய்ப்பைப் பெற்றுள்ளது.
சீனத் தலைநகர் பீஜிங்கில் 29வது ஒலிம்பிக் போட்டி நடக்கிறது. இதில் 205 நாடுகளைச் சேர்ந்த சுமார் 11 ஆயிரம் வீரர், வீராங்கனைகள் பங்கேற்றுள்ளனர். துப்பாக்கிச் சுடுதல் 10 மீட்டர் "ஏர் ரைபிள்' பிரிவில் இந்திய வீரர் அபினவ் பிந்த்ரா தங்கப் பதக்கம் வென்றார். இதற்கு பிறகு டென்னிஸ் நட்சத்திரங்கள் பயஸ், பூபதி, சானியா மிர்சா போன்றோர் ஏமாற்றினார். நீளம் தாண்டுதலில் அஞ்சு ஜார்ஜ் தகுதிச் சுற்றில் வெளியேற, நிலைமை மோசமானது. இந்தச் சூழலில் நேற்று நடந்த மல்யுத்த போட்டியில் டில்லியைச் சேர்ந்த 25 வயதான சுஷில் குமார் நம்பிக்கை தந்தார்.
சாதித்தார் சுஷில்: ஆண்களுக்கான 66 கி.கி., "பிரீஸ்டைல்' பிரிவில் பங்கேற்ற சுஷில் குமார் முதல் சுற்றில் உக்ரைனின் ஆன்ட்ரி ஸ்டாட்னிக்கிடம் தோல்வி அடைந்தார். ஆனாலும் "ரெபிசேஜ்' (வைல்ட் கார்ட் போன்றது) அடிப்படையில் அடுத்த சுற்றில் விளையாடும் வாய்ப்பைப் பெற்றார். இதில் அசத்தலாக செயல்பட்டார் சுஷில். துவக்கப் போட்டியில் அமெரிக்காவின் டக் ஸ்கவாபை வீழ்த்தினார். அடுத்த சுற்றில் பெலாரசின் ஆல்பர்ட் பாதிரோவை வென்றார். இதையடுத்து இரண்டு வெண்கலப் பதக்தங்கள் அடங்கிய அரையிறுதிக்கு முன்னேறினார். இதில் கஜகஸ்தானின் லியானிட் ஸ்பிரிடோனோவை சந்தித்தார். வென்றால்...வெண்கலம் உறுதி என்ற நிலையில் மிகுந்த துடிப்பாக செயல்பட்டார் சுஷில். இவரது இரும்புப் பிடியில் இருந்து லியானிட் தப்ப முடியவில்லை. தொடர்ந்து ஆதிக்கம் செலுத்திய சுஷில் குமார் 3-2 என்ற கணக்கில் வெற்றி பெற்று வெண்கலம் வென்றார். துருக்கியின் சாகின் ரமசான் தங்கம், உக்ரைனின் ஆன்ட்ரி ஸ்டாட்னிக் வெள்ளி வென்றனர். மற்றொரு வெண்கலப் பதக்கத்தை ஜார்ஜியாவின் ஓடார் துஷிஷ்விலி பெற்றார்.
ஜாதவுக்கு பிறகு: கடந்த 1952, ஹெல்சின்கி ஒலிம்பிக்கில் வெண்கலம் வென்ற ஜாதவுக்கு பிறகு மல்யுத்தத்தில் பதக்கம் பெறும் இரண்டாவது இந்திய வீரர் என்ற பெருமையை சுஷில் குமார் பெற்றுள்ளார். இதே 1952ல் நடந்த ஹாக்கியில் இந்திய அணி தங்கம் வென்றது. இதன் மூலம் ஒலிம்பிக் வரலாற்றில் 56 ஆண்டுகளுக்கு பிறகு தற்போது தான் இந்தியாவுக்கு இரண்டு பதக்கங்கள்(பிந்த்ரா, சுஷில் குமார்) கிடைத்துள்ளன.
விஜேந்தர் அபாரம்: தவிர நேற்று நடந்த குத்துச்சண்டை 75 கி.கி., "மிடில் வெயிட்' காலிறுதியில் இந்தியாவின் விஜேந்தர் குமார், ஈகுவடாரின் கார்லஸ் கங்கோராவை வீழ்த்தினார். இதையடுத்து அரையிறுதிக்கு முன்னேறியுள்ள விஜேந்தர் குறைந்தபட்சம் வெண்கலப் பதக்கத்தை உறுதி செய்துள்ளார். இவர் தொடர்ந்து சூப்பராக "குத்து' விட்டால் தங்கம் வென்றாலும் ஆச்சரியப்படுவதற்கில்லை.
வாழ்த்து, பரிசு மழை: வெண்கலம் வென்ற சுஷில் குமாருக்கு ஜனாதிபதி பிரதிபா பாட்டீல், பிரதமர் மன்மோகன் உள்ளிட்ட தலைவர்கள் வாழ்த்து தெரிவித்துள்ளனர். ரயில்வேயில் "டிக்கெட் இன்ஸ்பெக்டராக' பணிபுரியும் இவரை துணை "கமர்ஷியல் மேனேஜராக' பதவி உயர்த்துவதாக மத்திய அமைச்சர் லாலு தெரிவித்துள்ளார். தவிர ரூ. 55 லட்சம் பரிசு வழங்குவதாகவும் அறிவித்துள்ளார். இதைத் தவிர அரியானா அரசு ரூ. 25 லட்சம், டில்லி அரசு ரூ. 50 லட்சம் பரிசு வழங்குவதாக அறிவித்துள்ளன.